Ἐκεῖνό γε μήν γελοῖόν μοι κατεφάνη, τό εὔξασθαί τινα ὑείων ἀπέχεσθαι κρεῶν. Ὥστε καταξίωσον διδάσκειν αὐτούς, τῶν ἀπαιδεύτων προσευχῶν καί ἐπαγγελιῶν ἀπέχεσθαι, τήν μέν τοι χρῆσιν ἀδιάφορον εἶναι συγχώρησον. Οὐδέν γάρ κτίσμα Θεοῦ ἀπόβλητον, μετ᾿ εὐχαριστίας λαμβανόμενον, ὥστε ἡ εὐχή καταγέλαστος, οὐχ ἡ ἀποχή ἀναγκαία.
Ἄρχοντας μέν τοι ὀμνύειν ἐπί τό κακοποιεῖν τούς ἀρχομένους καί πάνυ θεραπεύεσθαι προσῆκε. Θεραπεία δέ τούτων διττή· μία μέν, μή ὀμνύειν αὐτούς διδάσκεσθαι προχείρως, ἑτέρα δέ, μή ἐπιμένειν ἐν ταῖς πονηραῖς κρίσεσιν. Ὥστε ὅρκῳ προληφθείς τις εἰς κακοποιΐαν ἕτερου, τήν μέν ἐπί τῇ προπετείᾳ τοῦ ὅρκου μετάνοιαν ἐπιδεικνύσθω, μή μέντοι…
Περί τῶν ἁρπαζόντων, κανόνα μέν παλαιόν οὐκ ἔχομεν, ἰδίαν δέ γνώμην ἐποιησάμεθα, τρία ἔτη καί αὐτούς καί τούς συναρπάζοντας αὐτοῖς ἔξω τῶν εὐχῶν γίνεσθαι. Τό δέ μή βιαίως γινόμενον, ἀνεύθυνόν ἐστιν, ὅταν μή φθορά ᾖ, μηδέ κλοπή ἡγουμένη τοῦ πράγματος· αὐτεξουσία δέ ἡ χήρα καί ἐπ᾿ αὐτῇ τό ἀκολουθῆσαι· ὥστε…
Οἱ τήν πρός θάνατον ἁμαρτίαν ἁμαρτάνοντες κληρικοί, τοῦ βαθμοῦ μέν κατάγονται, τῆς κοινωνίας δέ τῶν λαϊκῶν οὐκ ἐξείργονται. Οὐ γάρ ἐκδικήσεις δίς ἐπί τό αὐτό.
Ἡ γυνή, ἡ διά τῆς ὁδοῦ κυήσασα καί ἀμελήσασα τοῦ κυήματος, τῷ τοῦ φόνου ἐγκλήματι ὑποκείσθω.
Τάς μοιχευθείσας γυναῖκας καί ἐξαγορευούσας δι᾽ εὐλάβειαν ἤ ὁπωσοῦν ἐλεγχομένας, δημοσιεύειν μέν ἐκώλυσαν οἱ Πατέρες ἡμῶν, ἵνα μή θανάτου αἰτίαν παράσχωμεν ἐλεγχθείσαις, ἵστασθαι δέ αὐτάς ἄνευ κοινωνίας προσέταξαν μέχρι τοῦ συμπληροῦσθαι τόν χρόνον τῆς μετανοίας.
Ἐπί δέ τοῦ καταλειφθέντος ἀνδρός ὑπό τῆς γυναικός, τήν αἰτίαν χρή σκοπεῖν τῆς ἐγκαταλείψεως. Κᾂν φανῇ ἀλόγως ἀναχωρήσασα, ὁ μέν συγγνώμης ἐστίν ἄξιος, ἡ δέ ἐπιτιμίου· ἡ δέ συγγνώμη τούτῳ πρός τό κοινωνεῖν τῇ Ἐκκλησίᾳ δοθήσεται.
Στρατιώτιδες, αἱ τῶν ἀνδρῶν αὐτῶν ἀφανῶν ὄντων γαμηθεῖσαι, τῷ αὐτῷ ὑπόκεινται λόγῳ, ᾧπερ καί αἱ διά τήν ἀποδημίαν τῶν ἀνδρῶν, μή ἀναμείνασαι τήν ἐπάνοδον. Πλήν, ἔχει τινά συγγνώμην τό πρᾶγμα ἐνταῦθα, διά τό μᾶλλον πρός θάνατον εἶναι τήν ὑπόνοιαν.
Μετά τό ἀφαιρεθῆναι τήν ἀλλοτρίαν ὁ γαμήσας, ἐπί μέν τῇ πρώτῃ μοιχείας ἐγκληθήσεται, ἐπί δέ τῇ δευτέρᾳ ἀνεύθυνος ἔσται.
Αἱ κόραι, αἱ παρά τήν γνώμην τοῦ πατρός ἀκολουθήσασαι, πορνεύουσι, διαλλαγέντων δέ τῶν γονέων, δοκεῖ θεραπείαν λαμβάνειν τό πρᾶγμα. Οὐκ εὐθύς δέ εἰς τήν κοινωνίαν ἀποκαθίστανται, ἀλλ᾿ ἐπιτιμηθήσονται τρία ἔτη.
