Στρατιώτιδες, αἱ τῶν ἀνδρῶν αὐτῶν ἀφανῶν ὄντων γαμηθεῖσαι, τῷ αὐτῷ ὑπόκεινται λόγῳ, ᾧπερ καί αἱ διά τήν ἀποδημίαν τῶν ἀνδρῶν, μή ἀναμείνασαι τήν ἐπάνοδον. Πλήν, ἔχει τινά συγγνώμην τό πρᾶγμα ἐνταῦθα, διά τό μᾶλλον πρός θάνατον εἶναι τήν ὑπόνοιαν.
Καί αἱ τῶν στρατιωτῶν γυναῖκες, ἐπί πολύ τῶν οἰκείων ἀνδρῶν μή φαινομένων, ἐάν ἑτέροις συναφθῶσιν, ὁμοίως ἐπιτιμῶνται ταῖς λοιπαῖς γυναιξί, ταῖς ἀποδημησάντων ἐπί μακρόν τῶν ἀνδρῶν αὐτῶν γαμηθείσαις ἄλλοις. Ἔχουσι δέ τινα, φησί, συγγνώμην αἱ στρατιώτιδες, διά τό μᾶλλον ὑπονοεῖσθαι θανεῖν τούς στρατιῶτας, ἐκ τοῦ περί πολέμους, καί σφαγάς, καί κινδύνους ἀναστρέφεσθαι. Ἡ δέ συγγνώμη εἴη ἄν, τό τόν χρόνον τοῦ ἐπιτιμίου ἴσως ἐλαττοῦσθαι αὐταῖς. Καί οὗτος ὁ κανών ῥητῶς ἀναταττόμενος ἐν τῷ ἐννενηκοστῷ τρίτῳ κανόνι τῆς ἐν τῷ Τρούλλῳ συνόδου, ἑρμηνεύθη ἐκεῖσε. Αἱ στρατιώτιδες αἱ διά τήν τῶν ἀνδρῶν ἀφάνειαν ἄλλοις ζευγνύμεναι, συγγνωστότεραι τῶν ἄλλων, αἵ διά τάς ἀποδημίας οὐ περιμένουσι. Τῷ αὐτῷ τῆς μοιχείας ἐπιτιμίῳ ὑπόκεινται καί ἀμφότεραι αἱ γυναῖκες, ἤ τε τοῦ ἀστρατεύτου καί ἀποδήμου ὄντος καί πρό τοῦ πληροφορηθῆναι τόν θάνατον αὐτοῦ ἑτέρῳ γαμηθεῖσα, καί ἤ τοῦ στρατιώτου, ἐάν καί αὐτή, πρό τοῦ μαθεῖν ἀκριβῶς τά περί τῆς θανῆς τοῦ ἀνδρός αὐτῆς, ἑτέρῳ συναφθῇ. Ὅπως δέ αἱ στρατιώτιδες, μαθοῦσαι τούς ἰδίους ἄνδρας τετελευτηκέναι, ὀφείλουσιν ἐρευνᾷν περί τοῦ θανάτου αὐτῶν, ἡ Ἰουστινιάνειος ἑκατοστή ἑπτακαιδεκάτη νεαρά διαλαμβάνει, ἡ ἐν τῷ ἑβδόμῳ τίτλῳ τοῦ εἰκοστοῦ ὀγδόου βιβλίου τῶν βασιλικῶν κειμένη, ἧς ἡ δύναμις καί ἐν τῷ ἐννενηκοστῷ πρώτῳ κανόνι ἐγράφη τῆς ἐν τῷ Τρούλλῳ ἕκτης συνόδου. Ὁ δέ παρὼν κανὼν συγγνώμης τινός ἀξιοῖ τάς τῶν στρατιωτῶν γυναῖκας, παρά τάς γυναῖκας τῶν ἄλλως ἀποδημούντων, εἴπερ πρός δεύτερον γάμον ἔλθοιεν τῶν ἀνδρῶν αὐτῶν ἀφαντωθέντων, διά τό μᾶλλον πρός θάνατον εἶναι αὐτούς, καί μεγάλην διδόναι ὑπόνοιαν τήν ἀφάνειαν, ὡς τεθνήκασιν, ἤ ἀνῃρέθησαν. Οὗτος ὁ Κανὼν αὐτολεξεί ἐρανίσθη ἀπό τόν Ϟγ΄ τῆς στ΄. Καί ὅρα τήν ἑρμηνείαν αὐτοῦ ἐκεῖ.
