Ὅτι οὐ δεῖ Χριστιανούς ἐγκαταλείπειν τήν ἐκκλησίαν τοῦ Θεοῦ, καί ἀπιέναι, καί ἀγγέλους ὀνομάζειν, καί συνάξεις ποιεῖν, ἅπερ ἀπηγόρευται. Εἴ τις οὖν εὑρεθῇ ταύτῃ κεκρυμμένῃ εἰδωλολατρείᾳ σχολάζων, ἔστω ἀνάθεμα, ὅτι ἐγκατέλιπε τόν Κύριον ἡμῶν Ἰησοῦν Χριστόν, τόν Υἱόν τοῦ Θεοῦ, καί εἰδωλολατρείᾳ προσῆλθεν.
Ὅτι οὐ δεῖ ἱερατικούς ἤ κληρικούς, μάγους ἤ ἐπαοιδούς εἶναι, ἤ μαθηματικούς, ἤ ἀστρολόγους, ἤ ποιεῖν τά λεγόμενα φυλακτήρια, ἅτινά ἐστι δεσμωτήρια τῶν ψυχῶν αὐτῶν. Τούς δέ φοροῦντας, ῥίπτεσθαι ἐκ τῆς ἐκκλησίας ἐκελεύσαμεν.
Ὅτι οὐ δεῖ παρά τῶν Ἰουδαίων, ἤ αἱρετικῶν, τά πεμπόμενα ἑορταστικά λαμβάνειν, μηδέ συνεορτάζειν αὐτοῖς.
Ὅτι οὐ δεῖ παρά τῶν Ἰουδαίων ἄζυμα λαμβάνειν, ἤ κοινωνεῖν ταῖς ἀσεβείαις αὐτῶν.
Ὅτι οὐ δεῖ τοῖς ἔθνεσι συνεορτάζειν, καί κοινωνεῖν τῇ ἀθεότητι αὐτῶν.
Ὅτι οὐ δεῖ ἐπισκόπους καλουμένους εἰς σύνοδον καταφρονεῖν, ἀλλ᾽ ἀπιέναι, καί διδάσκειν, ἤ διδάσκεσθαι, εἰς κατόρθωσιν τῆς ἐκκλησίας καί τῶν λοιπῶν. Εἰ δέ καταφρονήσειεν ὁ τοιοῦτος, ἑαυτόν αἰτιάσεται, παρεκτός εἰ μή δι᾽ ἀνωμαλίαν ἀπολιμπάνοιτο.
Ὅτι οὐ δεῖ ἱερατικόν ἤ κληρικόν ἄνευ κελεύσεως ἐπισκόπου ὁδεύειν.
Ὅτι οὐ δεῖ ἱερατικούς, ἤ κληρικούς ἄνευ κανονικῶν γραμμάτων ὁδεύειν.
Ὅτι οὐ δεῖ ὑπηρέτας, κᾂν βραχύ, τάς θύρας ἐγκαταλείπειν, καί τῇ εὐχῇ σχολάζειν.
Ὅτι οὐ δεῖ γυναῖκας ἐν τῷ θυσιαστηρίῳ εἰσέρχεσθαι.
