Ὅτι οὐ δεῖ πρός πάντας αἱρετικούς ἐπιγαμίας ποιεῖν, ἤ διδόναι υἱούς, ἤ θυγατέρας, ἀλλά μᾶλλον λαμβάνειν, εἴγε ἐπαγγέλοιντο Χριστιανοί γίνεσθαι.

Ὅτι οὐ δεῖ αἱρετικῶν εὐλογίας λαμβάνειν, αἵτινές εἰσιν ἀλογίαι μᾶλλον, ἤ εὐλογίαι.

Ὅτι οὐ δεῖ αἱρετικοῖς, ἤ σχισματικοῖς συνεύχεσθαι.

Ὅτι οὐ δεῖ πάντα Χριοτιανόν ἐγκαταλείπειν μάρτυρας Χριστοῦ, καί ἀπιέναι πρός τούς ψευδομάρτυρας, τοὐτέστιν αἱρετικῶν, ἤ αὐτούς πρός τούς προειρημένους αἱρετικούς γενομένους· οὗτοι γάρ ἀλλότριοι τοῦ Θεοῦ τυγχάνουσιν. Ἔστωσαν οὖν ἀνάθεμα οἱ ἀπερχόμενοι πρός αὐτούς.

Ὅτι οὐ δεῖ Χριστιανούς ἐγκαταλείπειν τήν ἐκκλησίαν τοῦ Θεοῦ, καί ἀπιέναι, καί ἀγγέλους ὀνομάζειν, καί συνάξεις ποιεῖν, ἅπερ ἀπηγόρευται. Εἴ τις οὖν εὑρεθῇ ταύτῃ κεκρυμμένῃ εἰδωλολατρείᾳ σχολάζων, ἔστω ἀνάθεμα, ὅτι ἐγκατέλιπε τόν Κύριον ἡμῶν Ἰησοῦν Χριστόν, τόν Υἱόν τοῦ Θεοῦ, καί εἰδωλολατρείᾳ προσῆλθεν.

Ὅτι οὐ δεῖ ἱερατικούς ἤ κληρικούς, μάγους ἤ ἐπαοιδούς εἶναι, ἤ μαθηματικούς, ἤ ἀστρολόγους, ἤ ποιεῖν τά λεγόμενα φυλακτήρια, ἅτινά ἐστι δεσμωτήρια τῶν ψυχῶν αὐτῶν. Τούς δέ φοροῦντας, ῥίπτεσθαι ἐκ τῆς ἐκκλησίας ἐκελεύσαμεν.

Ὅτι οὐ δεῖ παρά τῶν Ἰουδαίων, ἤ αἱρετικῶν, τά πεμπόμενα ἑορταστικά λαμβάνειν, μηδέ συνεορτάζειν αὐτοῖς.

Ὅτι οὐ δεῖ παρά τῶν Ἰουδαίων ἄζυμα λαμβάνειν, ἤ κοινωνεῖν ταῖς ἀσεβείαις αὐτῶν.

Ὅτι οὐ δεῖ τοῖς ἔθνεσι συνεορτάζειν, καί κοινωνεῖν τῇ ἀθεότητι αὐτῶν.

Ὅτι οὐ δεῖ ἐπισκόπους καλουμένους εἰς σύνοδον καταφρονεῖν, ἀλλ᾽ ἀπιέναι, καί διδάσκειν, ἤ διδάσκεσθαι, εἰς κατόρθωσιν τῆς ἐκκλησίας καί τῶν λοιπῶν. Εἰ δέ καταφρονήσειεν ὁ τοιοῦτος, ἑαυτόν αἰτιάσεται, παρεκτός εἰ μή δι᾽ ἀνωμαλίαν ἀπολιμπάνοιτο.