Εἴ τις ἐπίσκοπος ἤ πρεσβύτερος, ἤ διάκονος, ἤ ὅλως τοῦ καταλόγου τοῦ ἱερατικοῦ, γάμου, καί κρεῶν, καί οἴνου, οὐ δι᾿ ἄσκησιν, ἀλλά διά βδελυρίαν ἀπέχηται, ἐπιλαθόμενος ὅτι πάντα καλά λίαν, καί ὅτι ἄρσεν καί θῆλυ ἐποίησεν ὁ θεός τόν ἄνθρωπον, ἀλλά βλασφημῶν διαβάλλῃ τήν δημιουργίαν, ἤ διορθούσθω, ἤ καθαιρείσθω, καί…
Εἴ τις ἐπίσκοπος ἤ πρεσβύτερος, τόν ἐπιστρέφοντα ἀπό ἁμαρτίας οὐ προσδέχεται, ἀλλ᾿ ἀποβάλλεται, καθαιρείσθω· ὅτι λυπεῖ Χριστόν, τόν εἰπόντα· Χαρά γίνεται ἐν οὐρανῷ ἐπί ἑνί ἁμαρτωλῷ μετανοοῦντι.
Εἴ τις ἐπίσκοπος, ἤ πρεσβύτερος, ἤ διάκονος, ἐν ταῖς ἡμέραις τῶν ἑορτῶν οὐ μεταλαμβάνει κρεῶν, καί οἴνου, βδελυσσόμενος καί οὐ δι᾿ ἄσκησιν, καθαιρείσθω, ὡς κεκαυτηριασμένος τήν ἰδίαν συνείδησιν, καί αἴτιος σκανδάλου πολλοῖς γινόμενος.
Εἴ τις κληρικός ἐν καπηλείῳ φωραθείη ἐσθίων, ἀφοριζέσθω· πάρεξ τοῦ ἐν πανδοχείῳ ἐν ὁδῷ δι᾿ ἀνάγκην καταλύοντος.
Εἴ τις κληρικός ὑβρίσοι τόν ἐπίσκοπον, καθαιρείσθω· ἄρχοντα γάρ τοῦ λαοῦ σου οὐκ ἐρεῖς κακῶς.
Εἴ τις κληρικός ὑβρίσοι πρεσβύτερον, ἤ διάκονον, ἀφοριζέσθω.
Εἴ τις κληρικός χωλόν, ἤ κωφόν, ἤ τυφλόν, ἤ τάς βάσεις πεπληγμένον χλευάσοι, ἀφοριζέσθω. Ὡσαύτως καί λαϊκός.
Ἐπίσκοπος, ἤ πρεσβύτερος, ἀμελῶν τοῦ κλήρου ἤ τοῦ λαοῦ, καί μή παιδεύων αὐτούς τήν εὐσέβειαν, ἀφοριζέσθω· ἐπιμένων δέ τῇ ἀμελείᾳ καί ῥᾳθυμίᾳ, καθαιρείσθω.
Εἴ τις ἐπίσκοπος, ἤ πρεσβύτερος, τινός τῶν κληρικῶν ἐνδεοῦς ὄντος, μή ἐπιχορηγοῖ τά δέοντα, ἀφοριζέσθω· ἐπιμένων δέ, καθαιρείσθω, ὡς φονεύσας τόν ἀδελφόν αὐτοῦ.
Εἴ τις τά ψευδεπίγραφα τῶν ἀσεβῶν βιβλία ὡς ἅγια ἐπί τῆς ἐκκλησίας δημοσιεύοι, ἐπί λύμῃ τοῦ λαοῦ καί τοῦ κλήρου, καθαιρείσθω.
