Εἴπομεν, ὅτι οὐ χρή ἐπίσκοπον, ἤ πρεσβύτερον καθιέναι ἑαυτόν εἰς δημοσίας διοικήσεις, ἀλλά προσευκαιρεῖν ταῖς ἐκκλησιαστικαῖς χρείαις. Ἢ πειθέσθω οὖν τοῦτο μή ποιεῖν, ἤ καθαιρείσθω. Οὐδείς γάρ δύναται δυσί κυρίοις δουλεύειν, κατά τήν Κυριακήν παρακέλευσιν.

Οἰκέτας εἰς κλῆρον προχειρίζεσθαι ἄνευ τῆς τῶν δεσποτῶν γνώμης οὐκ ἐπιτρέπομεν, ἐπί λύπῃ τῶν δεσποτῶν τῶν κεκτημένων· οἴκων γάρ ἀνατροπήν τό τοιοῦτον ἐργάζεται. Εἰ δέ ποτε καί ἄξιος φανείη οἰκέτης πρός χειροτονίαν βαθμοῦ, οἷος καί ὁ ἡμέτερος Ὀνήσιμος ἐφάνη, καί συγχωρήσωσιν οἱ δεσπόται, καί ἐλευθερώσωσι, καί τοῦ οἴκου ἐξαποστείλωσι, γινέσθω.

Ἐπίσκοπος, ἤ πρεσβύτερος, ἤ διάκονος, στρατείᾳ σχολάζων καί βουλόμενος ἀμφότερα κατέχειν, Ῥωμαϊκήν ἀρχήν καί ἱερατικήν διοίκησιν, καθαιρείσθω. Τά γάρ Καίσαρος, Καίσαρι· καί τά τοῦ Θεοῦ, τῷ Θεῷ.

Εἴ τις ὑβρίσοι βασιλέα ἤ ἄρχοντα παρά τό δίκαιον, τιμωρίαν τιννύτω· καί εἰ μέν κληρικός, καθαιρείσθω· εἰ δέ λαϊκός, ἀφοριζέσθω.

Ἔστω ὑμῖν πᾶσι κληρικοῖς καί λαϊκοῖς βιβλία σεβάσμια καί ἅγια, τῆς μέν Παλαιᾶς Διαθήκης, Μωϋσέως, πέντε· Γένεσις, Ἔξοδος, Λευϊτικόν, Ἀριθμοί, Δευτερονόμιον· Ἰησοῦ Ναυῆ, ἕν· Κριτῶν, ἕν· Ρούθ, ἕν· Βασιλειῶν, τέσσαρα· Παραλειπομένων, τῆς βίβλου τῶν ἡμερῶν, δύο· Ἔσδρα, δύο· Ἐσθήρ, ἕν· Μακκαβαίων, τρία· Ἰώβ, ἕν· Ψαλτηρίου, ἕν· Σολομῶντος, τρία, Παροιμίαι, Ἐκκλησιαστής,…