Τούς ἁρπάζοντας γυναῖκας ἐπ᾿ ὀνόματι συνοικεσίου, ἤ συμπράττοντας, ἤ συναιρομένους τοῖς ἁρπάζουσιν, ὥρισεν ἡ ἁγία σύνοδος, εἰ μέν κληρικοί εἶεν, ἐκπίπτειν τοῦ οἰκείου βαθμοῦ· εἰ δέ λαϊκοί, ἀναθεματίζεσθαι.
Οὗτος ὁ κανών τῆς ἐν Χαλκηδόνι συνόδου ἐστίν εἰκοστός ἕβδομος· εἴπομεν οὖν περί τούτου ἐκεῖ. Ὁ παρών κανών ἀπαράλλακτός ἐστι κανών κζ΄ τῆς ἐν Χαλκηδόνι συνόδου, καί ζήτει τά ἐν αὐτῷ παραγραφέντα, καί τίτλον θ΄ τοῦ παρόντος συντάγματος, κεφ. λ΄ καί τά ἐν αὐτῷ. Ὠσαύτως καί τόν ξζ΄ ἀποστολικόν κανόνα. Τί δέ; Ἐάν μή ὀνόματι συνοικεσίου ἁρπάσῃ τις γυναῖκα, ἀλλά διά πορνείαν, οὐ κολασθήσεται σύν τοῖς συμπράξασι καί συναραμένοις αὐτῷ; Λύσις. Καί μάλιστα· τοῦτο γάρ ἀζήτητόν ἐστι· τό δέ ποιοῦν τήν ζήτησιν ὑπῆρχεν ἡ πρόφασις τοῦ συνοικεσίου· ἔλεγον γάρ τινες, μηδέν τι κακόν ποιῆσαι τόν ἁρπάσαντα γυναῖκα διά τό νομίμως συναφθῆναι αὐτῇ, ἴσως καί ἀναξίαν οὖσαν τῷ γένει τούτου, κἀντεῦθεν μεγάλως χειραγωγουμένην. Ὅπερ τοῖς Πατράσιν οὐκ ἔδοξεν, ὡς προτρεπτικόν κακίας, καί τήν εὐταξίαν καταστρέφον τῶν πόλεων. Ἔτι ἐρωτήσει τις, Ἤ μετά τήν ἁρπαγήν θελήσῃ ἡ ἁρπαγεῖσα συνδιάγειν νομίμως τῷ ἅρπαγι, ἀκουσθήσεται; Λύσις. Οὐδαμῶς· φησί γάρ ἡ ρμγ΄ Ἰουστινιάνειος νεαρά, ἤτοι τό γ΄ κεφ., τοῦ νη΄ τίτ., τοῦ ξ΄ βιβλίου, ταῦτα ῥητῶς· Μή γαμείσθω ἡ ἁρπαγεῖσα τῷ ἁρπάσαντι αὐτήν· ἀλλ’ εἰ καί συναινέσουσι τῷ τοιούτῳ συνοικεσίῳ οἱ γονεῖς αὐτῆς, περιορίζονται. Τό δέ δ΄, ε΄ καί στ΄ κεφάλ. τοῦ αὐτοῦ τίτλου καί βιβλίου λέγουσι, τήν ἁρπαγεῖσαν κερδαίνειν τά τοῦ ἁρπάσαντος πράγματα, μή θελήσασαν συζευχθῆναι νομίμως αὐτῷ· ἐπείτοι γε, εἰ θελήσει τοῦτο, δημεύεται ἡ τε περιουσία ταύτης, καί τοῦ ἅρπαγος, καί τῶν συναιρομένων ἐπί τῷ κακῷ, κᾂν τε γονεῖς τούτων ὦσι, κᾂν τε ἀλλότριοι. Ἀνάγνωθι καί τόν αὐτόν νη΄ ὅλον τίτλον, καί μαθήσῃ, ὅτι πᾶς ἁρπάσας γυναῖκα οἱανδήτινα, κᾂν ἐστι μνηστή αὐτοῦ, κᾂν δούλη, ἤ ἀπελευθέρα, εἰ μέν μεθ’ ὅπλων, αὐτός μέν ξίφει τιμωρεῖται· οἱ δέ συμπράττοντες, καί συναιρόμενοι αὐτῷ, τυπτόμενοι, καί κουρευόμενοι ῥινοκοποῦνται· εἰ δέ χωρίς ὅπλων, ὁ μέν ἅρπαξ χειροκοπεῖται· οἱ δέ βοηθοί αὐτοῦ τυπτώμενοι καί κουρευόμενοι ἐξορίζονται. Ταῦτα μέν οὕτω γίνονται, κᾂν καί αὐτή ἡ γυνή ἐπί τῇ ἁρπαγῇ συναινέσῃ· ἀνάγνωθι καί τήν λε΄ νεαράν τοῦ βασιλέως κυροῦ Λέοντος τοῦ Σοφοῦ. Οἱ ἁρπάζοντες γυναῖκας, καί οἱ συμπράττοντες, καί συναιρόμενοι, κληρικοί μέν, καθαιροῦνται· λαϊκοί δέ, ἀναθεματίζονται. Τά αὐτά διαλαμβάνει τῷ παρόντι κανόνι καί ὁ εἰκοστός ἕβδομος κανών τῆς ἐν Χαλκηδόνι συνόδου· ἐγράφη δέ παρ’ ἡμῶν ἐν ἐκείνῳ, ὡς, μέχρις ἄν τήν ἁρπαγεῖσαν ἀποκαταστήσωσιν οἱ ἁρπάσαντες, εἰ μέν προμνηστευθεῖσα ἦν, τῷ οἰκείῳ μνηστῆρι· εἰ δέ σχολάζουσα, τοῖς γονεῦσιν αὐτῆς· τόν ἀναθεματισμόν, λαϊκοί ὄντες, οὐκ ἐκφεύξονται. Ὁ παρών Κανών αὐτολεξεί κζ΄ Κανὼν τῆς δ΄ ἐστί, καί ἀνάγνωθι τήν ἑρμηνείαν ἐκεῖ.
