Ὁ μέντοι καταλιμπάνων τήν νομίμως αὐτῷ συναφθεῖσαν γυναῖκα καί ἑτέραν ἀγόμενος, κατά τήν τοῦ Κυρίου ἀπόφασιν, τῷ τῆς μοιχείας ὑπόκειται κρίματι. Κεκανόνισται γάρ παρά τῶν Πατέρων ἡμῶν, τούς τοιούτους ἐνιαυτόν προσκλαίειν, διετίαν ἐπακροᾶσθαι, τριετίαν ὑποπίπτειν, τῷ δέ ἑβδόμῳ συνίστασθαι τοῖς πιστοῖς, καί οὕτω τῆς προσφορᾶς καταξιοῦσθαι, ἐάν μετά δακρύων μετανοήσωσιν.
Τούς τάς ἑαυτῶν συμβίους καταλιμπάνοντας, καί ἑτέρας πρός γάμον ἀγομένους, φησίν ὁ ἅγιος, ὡς μοιχούς παρά τοῦ Κυρίου κατακρίνεσθαι∙ λέγει γάρ ἐν Εὐαγγελίοις ὁ Κύριος∙ Ὁ ἀπολύσας τήν γυναῖκα παρεκτός λόγου πορνείας, καί γαμήσας ἑτέραν μοιχᾶται. Οἱ δέ Πατέρες, φησίν, ἡμῶν ἐκανόνισαν τούς τοιούτους ἐν ἑπταετίᾳ ἐπιτιμᾶσθαι, καί οὕτω δέχεσθαι εἰς μετάληψιν τῆς προσφορᾶς, ἐάν μετά δακρύων μετανοήσωσιν. Εἰπὼν δέ τό παρά τῶν Πατέρων ἐπενεχθέν αὐτοῖς ἐπιτίμιον, οὐδέν προσέθετο, ἀρκεῖν ἡγησάμενος, ὅτι μοιχείαν τό ἁμάρτημα κατά τόν τοῦ Κυρίου λόγον ἀπέφηνεν∙ ἕπεται γάρ ὡς μοιχείᾳ καί τοῖς μοιχεύουσιν εἰς ἐπιτίμησιν ὁρισθείς παρ᾽ αὐτοῦ χρόνος. Ὁ τήν ἰδίαν ἀφείς, καί λαμβάνων ἑτέραν, μοιχός ὤν, ἑπταετίαν ὑποπιπτέτω. Καί οὗτος ὁ κανὼν συνηρμηνεύθη τῷ ξη΄ κανόνι. Ὁ κανὼν οὗτος αὐτολεξεί ἐρανίσθη ἀπό τόν πζ΄ τῆς στ΄ Κανόνα, καί ὅρα τήν ἑρμηνείαν αὐτοῦ ἐκεῖ.
