Ἡ γυνή, ἡ διά τῆς ὁδοῦ κυήσασα καί ἀμελήσασα τοῦ κυήματος, τῷ τοῦ φόνου ἐγκλήματι ὑποκείσθω.
Ἐάν γυνή ἔγκυος ὁδεύουσα, ὠδινήσῃ, καί τέκῃ ἐν τῇ ὁδῷ, καί δυναμένη ζωογονῆσαι καί περισῶσαι τό τεχθέν καταφρονήσῃ αὑτοῦ, καί ἀφήσῃ ἀνεπιμέλητον, ὡς φονεύσασα αὐτό κρίνεται, κᾂν ἴσως τό βρέφος ἕτερός τις εὑρὼν ἀνέληται, καί ἐπιμελησάμενος ζωογονήσῃ. Εἰ δέ ἀδύνατόν ἐστι περιποιήσασθαι τοῦτο, τυχόν γάρ αἰχμάλωτος ἥγετο, καί ἐν τῇ ὁδῷ ἔτεκεν, ἤ πολεμίους ἔφευγε, καί φεύγουσα ἀπεκύησε, καί οὐκ ἠδύνατο καί ἑαυτήν περισῶσαι καί τό τεχθέν, κρυβεῖσα γάρ ἴσως κατεμηνύθη ἂν ὑπό τοῦ βρέφους κλαυθμυριζομένου, συγγνωσθήσεται. Γυνή τις ἔγκυος ὁδεύουσα ἔτεκεν ἐν τῇ ὁδῷ, καί δυναμένη ζωογονῆσαι τό κυηθέν, κατεφρόνησεν αὐτοῦ∙ φησίν ὁ ἅγιος, τῷ τοῦ φονέως ἐγκλήματι ταύτην ὑποκεῖσθαι πάντως, κᾂν μή τελευτήσῃ τό βρέφος, ἀλλά παρ᾽ ἑτέρου ζωογονηθῇ∙ τό γάρ ὑποκεῖσθαι αὐτήν τῷ ἐγκλήματι τοῦ βρέφους τελευτήσαντος, ἀζήτητόν ἐστι καί ἀναμφίβολον. Ἐάν δέ οὐκ εἶχε πρός ἰσχύος ζωογονῆσαι τό βρέφος, διά τό ἕλκεσθαι τυχόν ὑπό πολεμίων ὡς αἰχμάλωτος, οὐδόλως κολασθήσεται∙ καί ἀνάγνωθι τόν νβ΄ κανόνα τοῦ ἁγίου τούτου, ἑρμηνεύοντα καί τόν παρόντα κανόνα. Περί μέν τοι τοῦ κολάζεσθαι, εἴτε καί μή, τάς ἐκτιθεμένας τά οἰκεῖα βρέφη εἰς τάς εἰσόδους τῶν θείων ναῶν, λόγος ἐγένετο διαφόρως ἐπί συνελεύσει συνοδικῇ, καί ἤρεσεν, ὡς φονευτρίας ταύτας κολάζεσθαι, κᾂν παρά τινων τά βρέφη ζωογονηθῶσιν. Ἀνάγνωθι καί κεφ. δ΄, τοῦ στ΄ τίτλου, τοῦ λα΄ βιβλίου οὕτω λέγον∙ Φονεύει τό τικτόμενον οὐ μόνον ὁ πνίγων, ἀλλά καί ὁ ῥίπτων, καί ὁ μή τρέφων, καί ὁ ἐν δημοσίοις τόποις ἐκτιθέμενος ἐπί ἐλεημοσύνῃ, ἥν αὐτός οὐκ ἔσχεν. Ἀνάγνωθι καί τόν β΄ ὅλον τίτλον, τοῦ λγ΄ βιβλίου, διοριζόμενον, τούς ἐκτιθεμένους, κᾂν δοῦλοι ὦσιν, ἀπεντεῦθεν ἐλευθεροῦσθαι. Κολάζεσθαι μέντοι ὀφείλει ἡ τοιαύτη γυνή ἀπό μεγάλης ἀμελείας ἐοικυίας δόλῳ, τῆς καί λεγομένης παρά τῶν νομομαθῶν, λάτα κούλπα∙ τυχόν γάρ οὖσα ἐπιμελής περί τά οἰκεῖα, περί τήν τοῦ βρέφους ζωογόνησιν διετέθη καταφρονητικῶς∙ ἐπείτοι γε ἐάν περί τά οἰκεῖα τοιαύτη ἦν ἀμελής, ἤ ὡς οὖσα εὐγενής καί μή εἰδυῖα τήν βρεφικήν ἐπιμέλειαν, ἤ ὡς κατά φύσιν ἀνεπιτηδεία οὖσα, καί συνέβη τοιουτοτρόπως τό βρέφος μή ζωογονηθῆναι, οὐ κολασθήσεται, ὡς οἴομαι. Ἡ κυήσασα ἐν ὁδῷ, καί τοῦ τεχθέντος ἀμελήσασα, φονεύτρια, Σαφής. Διορίζει ὁ παρών κανών, ὅτι ἀνίσως γυναῖκα εἰς τόν δρόμον εὑρισκομένη, τύχη νά γεννήσῃ, ἐάν ἀμελήσῃ τοῦ παιδίου της, καί ἀποθάνῃ, ὡς φονεύτρια κανονίζεται.
